[๑๑๖๘] ถิโยว ตสฺส ชายนฺติ น ปุมา ชายเร กุเล
โย ชานํ ปุจฺฉิโต ปญฺหํ อญฺญถา นํ วิยากเร
สเจ หิ สจฺจํ ภณสิ โหหิ ราช ยถา ปุเร
มุสา เจ ภาสเส ราช ภิยฺโย ปวิส เจติย ฯ
[๑๑๖๙] ปุตฺตา ตสฺส น ภวนฺติ ปกฺกมนฺติ ทิโสทิสํ
โย ชานํ ปุจฺฉิโต ปญฺหํ อญฺญถา นํ วิยากเร
สเจ หิ สจฺจํ ภณสิ โหหิ ราช ยถา ปุเร
มุสา เจ ภาสเส ราช ภิยฺโย ปวิส เจติย ฯ
[๑๑๗๐] ส ราชา อิมินา ปตฺโต ๑ อนฺตลิกฺขจโร ปุเร
ปาเวกฺขิ ปฐวึ เปจฺโจ หีนตฺโต อตฺตปริยายํ ๒
ตสฺมา หิ ฉนฺทาคมนํ นปฺปสํสนฺติ ปณฺฑิตา
อทุฏฺฐจิตฺโต ภาเสยฺย คิรํ สจฺจูปสญฺหิตนฺติ ฯ
เจติยราชชาตกํ ฉฏฺฐํ ฯ
____________
๗ อินฺทฺริยชาตกํ
[๑๑๗๑] โย อินฺทฺริยานํ กาเมน วสํ นารท คจฺฉติ
โส ปริจฺจชฺชุโภ โลเก ชีวนฺโตปิ ๓ วิสุสฺสติ ฯ
[๑๑๗๒] สุขสฺสานนฺตรํ ทุกฺขํ ทุกฺขสฺสานนฺตรํ สุขํ
โสปิ ปตฺโต สุขทุกฺขํ ปาฏิกงฺข วรํ สุขํ ฯ #๑ สี. ม. อิสินา สตฺโต ฯ ๒ สี. ม. ปตฺวปริยายํ ฯ ๓ ม. ชีวนฺโตว ฯ