เต เม สาธูติ วตฺวาน ยถาสตฺติ ยถาพลํ

ทานานิ ปฏิยาเทตฺวา ทกฺขิเณยฺยํ คเวสิสุํ ฯ

อหํ นิปชฺช ๑ จินฺเตสึ ทานํ ทกฺขิณนุจฺฉวํ

ยทิหํ ลเภ ทกฺขิเณยฺยํ กึ เม ทานํ ภวิสฺสติ ฯ

น เม อตฺถิ ติลมุคฺคา น มาสา ตณฺฑุลา ฆตํ

อหํ ติเณน ยาเปมิ น สกฺกา ติณทาตเว ฯ

ยทิ โกจิ เอติ ทกฺขิเณยฺโย ภิกฺขาย มม สนฺติเก

ทชฺชาหํ สกมตฺตานํ น โส ตุจฺโฉ คมิสฺสติ ฯ

มม สงฺกปฺปมญฺญาย สกฺโก พฺราหฺมณวณฺณินา

อาสยํ เม อุปคจฺฉิ ทานํ วีมํสนาย เม ฯ

ตมหํ ทิสฺวาน สนฺตุฏฺโฐ อิทํ วจนมพฺรวึ

สาธุ โขสิ อนุปฺปตฺโต ฆาสเหตุ มมนฺติเก ฯ

อทินฺนปุพฺพํ ทานวรํ อชฺช ทสฺสามิ เต อหํ

ตุวํ สีลคุณูเปโต อยุตฺตนฺเต ปรเหธนํ ฯ

เอหิ อคฺคึ ปทีเปหิ นานากฏฺเฐ สมานย

อหํ ปจิสฺสมตฺตานํ ปกฺกํ ตฺวํ ภกฺขยิสฺสสิ ฯ

สาธูติ โส หฏฺฐมโน นานากฏฺเฐ สมานยิ

มหนฺตํ อกาสิ จิตฺตกํ กตฺวานงฺคารคพฺภกํ ฯ

อคฺคึ ตตฺถ ปทีเปสิ ๒ ยถา โส ขิปฺปํ มหาภเว

โผเฏตฺวา รชคเต คตฺเต เอกมนฺตํ อุปาวิสึ ๓ ฯ #๑ ม. ยุ. นิสชฺช ฯ ๒ ยุ. ปทีเปติ ฯ ๓ ยุ. อุปาวิสิ ฯ