รตฺตินฺทิวํ โส คงฺคาย วุยฺหมาโน มโหทเก

รวนฺโต กรุณํ รวํ มชฺเฌ คงฺคาย คจฺฉติ ฯ

ตสฺสาหํ สทฺทํ สุตฺวาน กรุณํ ปริเทวโต

คงฺคาย ตีเร ฐตฺวา ๑ อปุจฺฉึ โกสิ ตฺวํ นโร ฯ

โส เม ปุฏฺโฐ [๒] วิยากาสิ อตฺตโน การณํ ตทา

ธนิเกหิ ภีโต ตสิโต ปกฺขนฺโนมํ ๓ มหานทึ ฯ

ตสฺส กตฺวาน การุญฺญํ จชิตฺวา มม ชีวิตํ

ปวิสิตฺวา นีหรินฺตสฺส อนฺธการมฺหิ รตฺติยา ฯ

อสฺสตฺถกาลมญฺญาย ตสฺสาหํ อิทมพฺรวึ

เอกนฺตํ วรํ ยาจามิ มา มํ กสฺสจิ ปาวท ฯ

นครํ คนฺตฺวาน อาจิกฺขิ ปุจฺฉิโต ธนเหตุโก

ราชานํ โส คเหตฺวาน อุปคญฺฉิ มมนฺติกํ ฯ

ยาวตา การณํ สพฺพํ รญฺโญ อาโรจิตํ มยา

ราชา สุตฺวาน วจนํ อุสุํ ตสฺส ปกปฺปยิ ฯ

อิเธว ฆาฏยิสฺสามิ มิตฺตทุพฺภึ อนริยํ

ตมหํ อนุรกฺขนฺโต นิมฺมินึ มม อตฺตนา ฯ

ติฏฺฐ เต โส มหาราช กามกาโร ภวามิ เต

อนุรกฺขึ มม สีลํ นารกฺขึ มม ชีวิตํ

สีลวา หิ ตทา อาสึ โพธิยาเยว การณาติ ฯ

รุรุมิคจริยํ ฉฏฺฐํ ฯ

#๑ ม. ยุ. ฐตฺวาน ฯ ๒ ม. ยุ. จ ฯ ๓ ม. ปกฺขนฺโทหํ ฯ ยุ. ปกฺขนฺโตหํ ฯ