อิตฺถํ สุทํ อายสฺมา มณิปูชโก เถโร อิมา คาถาโย อภาสิตฺถาติ ฯ
มณิปูชกตฺเถรสฺส อปทานํ สมตฺตํ ฯ
นวมํ ติกิจฺฉกตฺเถราปทานํ (๑๗๙)
[๑๘๑] นคเร พนฺธุมติยา เวชฺโช อาสึ สุสิกฺขิโต
อาตุรานํ สุทุกฺขีนํ ๑ มหาชนสุขาวโห ฯ
พฺยาธิตํ สมณํ ทิสฺวา สีลวนฺตํ มหาชุตึ
ปสนฺนจิตฺโต สุมโน เภสชฺชมททึ ตทา ฯ
อโรโค อาสิ เตเนว สมโณ สํวุตินฺทฺริโย
อโสโก นาม นาเมน อุปฏฺฐาโก วิปสฺสิโน ฯ
เอกนวุเต อิโต กปฺเป ยํ โอสถมทาสหํ
ทุคฺคตึ นาภิชานามิ เภสชฺชสฺส อิทํ ผลํ ฯ
อิโต จ อฏฺฐเม กปฺเป สพฺโพสถสนามโก
สตฺตรตนสมฺปนฺโน จกฺกวตฺติ มหพฺพโล ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา ติกิจฺฉโก เถโร อิมา คาถาโย อภาสิตฺถาติ ฯ
ติกิจฺฉกตฺเถรสฺส อปทานํ สมตฺตํ ฯ
#๑ ม. สทุกฺขานํ ฯ