ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา กิลญฺชทายโก เถโร อิมา คาถาโย อภาสิตฺถาติ ฯ
กิลญฺชทายกตฺเถรสฺส อปทานํ สมตฺตํ ฯ
ปญฺจมํ เวทิทายกตฺเถราปทานํ (๒๓๕)
[๒๓๗] วิปสฺสิโน ภควโต โพธิยา ปาทปุตฺตเม
ปสนฺนจิตฺโต สุมโน กาเรสึ เวทิกํ อหํ ฯ
เอกนวุเต อิโต กปฺเป กาเรสึ เวทิกํ อหํ
ทุคฺคตึ นาภิชานามิ เวทิกาย อิทํ ผลํ ฯ
อิโต เอกาทเส กปฺเป อโหสึ สูริยสฺสโม
สตฺตรตนสมฺปนฺโน จกฺกวตฺติ มหพฺพโล ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา เวทิทายโก เถโร อิมา คาถาโย อภาสิตฺถาติ ฯ