มยมฺปิ ถูปํ กริสฺสาม โลกนาถสฺส ตาทิโน

รตเนหิ ๑ ฉาทยิสฺสาม อายตํ พุทฺธเจติยํ ฯ

โยชนนฺเตปิ วฑฺเฒสุํ อายตํ พุทฺธเจติยํ

ปญฺจโยชนมุพฺเพโธ ถูโป โอภาสตี ตทา ฯ

ยกฺขา ๒ ตตฺถ สมาคนฺตฺวา เอกโต มนฺตยุํ ตทา

มนุชา เทวตา นาคา กุมฺภณฺฑา ครุฬา ตทา ฯ

ปจฺเจกํ พุทฺธเสฏฺฐสฺส อกํสุ ถูปมุตฺตมํ

มา โน ปมตฺตา อสฺสุมฺหา อปฺปมตฺตา สเทวกา ฯ

มยํปิ ถูปํ กริสฺสาม โลกนาถสฺส ตาทิโน

ผลิกา ๓ ฉาทยิสฺสาม อายตํ พุทฺธเจติยํ ฯ

โยชนนฺเตปิ วฑฺเฒสุํ อายตํ พุทฺธเจติยํ

ฉโยชนานิ อุพฺพิทฺโธ ถูโป โอภาสตี ตทา ฯ

คนฺธพฺพา จ สมาคนฺตฺวา เอกโต มนฺตยุํ ตทา

มนุชา เทวตา นาคา ครุฬา กุมฺภยกฺขกา ฯ

๔ กตา พุทฺธถูปํ มยเมตฺถ อการกา

มยมฺปิ ถูปํ กริสฺสาม โลกนาถสฺส ตาทิโน ฯ

เวทิโย สตฺต กตฺวาน ยาว ชงฺฆา อกํสุ เต

สพฺพโสวณฺณมยํ ถูปํ คนฺธพฺพา การยุํ ตทา ฯ

สตฺตโยชนมุพฺเพโธ ถูโป โอภาสเต ตทา

รตฺตินฺทิวา น ญายนฺติ อาโลกา ๕ โหนฺติ สพฺพทา ฯ #๑ โป. ยุ. ผลิกา ฉาทยิสฺสาม ฯ ๒ โป. ยุ. คนฺธพฺพา จ ... ฯ ๓ ม. ผลิกาหิ ฯ #๔ ม. สพฺเพกํสุ พุทฺธถูปํ ฯ ๕ ม. ยุ. อาโลโก โหติ สพฺพทา ฯ